‘Sexting’-a eta ‘selfie’ postkoitala

Elkarrekin ezin egon eta bikotekidearekin sua mantentzeko moduaren bila bazabiltza, mugikorrari so egin eta bertan aurkituko duzu irtenbide posible bat: argazki erotikoak.

---

Internetek eta teknologia berriek milaka aukera eskaintzen dizkigute, eta horiek erabiliz zein akatsetatik ikasiz aurrera egiten dugu. Hala, bikoteen intimitatea eta maila desberdinetan guztiok dugun exhibizionismoa garatzeko espazio berri bat ireki digu Internetek.

Norbere argazki, idatzi edo bideo erotikoak IKT-ak erabilita beste norbaiti bidaltzea sexting bezala ezagutzen da. Sarrerako adibidean bezala, bikote askok erabiltzen dute praktika hori distantziaren trabak gutxiagotzeko. Desira erotikoa berpiztu edo mantentzeko balio du. Gainera, norbere auto-estimua indartzeko oso erabilgarria izan daiteke.

Hala ere, gazteek egiten dutenean, eta are gehiago, bikotekide egonkorra ez denarekin egiten badute, euren hezitzaile eta gurasoen kezkak pizten dituzte. Askotan ahazten dugun arren, helduek ere gazteen akatsak egiten dituzte. Hau da, gazteak Sarean segurtasuna kontua izan gabe ibiltzen direla esaten da, baina ondoren wifi irekiak eta segurtasunik gabeko aplikazioak erabiltzen lehenak izaten dira heduak.

Bestalde, nahiz eta bikotekidearekin partekatzen duguna konfiantza dugulako partekatu, harremanen egoera aldakorra izan daitekeela ahazten dugu. Aldaketa horiek haserre eta xantaia posibleak ekar ditzakete, eta agian partekatutakoa min egiteko asmoarekin erabili daiteke. Hori ekiditeko ez da beharrezkoa sexting egiteari uztea, nahikoa izango litzake segurtasun sistema bereziak dituzten aplikazioak eta wifi sareak erabiltzea. Komenigarria litzateke, era berean, argazkietan identifikagarri izan daitezkeen elementuak, aurpegia eta tatuaiak kasu, ez bistaratzea.

'Aftersex Selfie'
Selfie moda iritsi da erotikaren arlora ere. Instagram bezalako sare sozialetan, azkenaldian, geroz eta maizago aurki ditzakegu aftersex selfie deiturikoak, hau da, harreman erotikoa amaitu ondoren bikoteak edo bietako batek selfie bat atera eta sarera igotzea. Horrek badu exhibizionismo puntua asetzeko gaitasuna eta, sexting-ak bezala, auto-estimua indartzeko ahalmena. Ezin dugu ahaztu, hala ere, gure intimitatean gera zitekeena publikatzen ari garela, eta horrek besteen epaiak eta kritikak ekar ditzakeela.

Gazte izan ala ez, bikote egonkorrarekin edo ez, komenigarria da partekatzen dugun intimitatea, orainaldian eta etorkizunean, nahi dugunekin bakarrik partekatzen dugula ziurtatzeko neurriak hartzea. Teknologia berriek erotika garatzeko aukera paregabe eta anitzak eskaintzen dizkigute. Gure esku dago, ordea, sor daitezkeen egoera desatseginak ekidin eta gure arte erotikoaz gozatzea.